mazaq-e-ishq se main sharmsar ho na saka

mazāq-e-ishq se maiñ sharmsār ho na sakā

ki rāzdāñ bhī mirā rāzdār ho na sakā

nazar se zarroñ ko ulTā galoñ ko chaak kiyā

magar maiñ sar-ḳhush-e-dīdār-e-yār ho na sakā

shabāb-o-ishq kī kul umr ek lamha thī

mujhe ye lamha magar sāzgār ho na sakā

bajā-e-ḳhud mirī hastī ko kar diyā uryāñ

vo parda-dār mirā parda-dār ho na sakā

vo kis bharosa par ummīd-vār ho terā

tirī nazar pe jise e.atibār ho na sakā

mulāhiza ho mohabbat kā zauq-e-nazzāra

jo āshkār thā vo āshkār ho na sakā

mirā ma.aal bhī hotā chaman sā ibrat-nāk

junūñ kā shukr ki vaqf-e-bahār ho na sakā

nigāh-e-mast kā mamnūn-e-kaif huuñ 'maḳhmūr'

ki pī to ḳhuub magar bāda-ḳhvār ho na sakā

mazaq-e-ishq se main sharmsar ho na saka

ki raazdan bhi mera raazdar ho na saka

nazar se zarron ko ulTa galon ko chaak kiya

magar main sar-KHush-e-didar-e-yar ho na saka

shabab-o-ishq ki kul umr ek lamha thi

mujhe ye lamha magar sazgar ho na saka

baja-e-KHud meri hasti ko kar diya uryan

wo parda-dar mera parda-dar ho na saka

wo kis bharosa par ummid-war ho tera

teri nazar pe jise eatibar ho na saka

mulahiza ho mohabbat ka zauq-e-nazzara

jo aashkar tha wo aashkar ho na saka

mera maal bhi hota chaman sa ibrat-nak

junun ka shukr ki waqf-e-bahaar ho na saka

nigah-e-mast ka mamnun-e-kaif hun 'maKHmur'

ki pi to KHub magar baada-KHwar ho na saka