معیار اپنا ہم نے گرایا نہیں کبھی

معیار اپنا ہم نے گرایا نہیں کبھی

جو گر گیا نظر سے وہ بھایا نہیں کبھی

ہم آشنا تھے موجوں کے برہم مزاج سے

پانی پہ کوئی نقش بنایا نہیں کبھی

حرص و ہوس کو ہم نے بنایا نہیں شعار

اور اپنا اعتبار گنوایا نہیں کبھی

اک بار اس کی آنکھوں میں دیکھی تھی بے رخی

پھر اس کے بعد یاد وہ آیا نہیں کبھی

تنہائیوں کا راج ہے دل میں تمھارے بعد

ہم نے کسی کو اس میں بسایا نہیں کبھی

تسنیمؔ جی رہے ہیں بڑے حوصلے کے ساتھ

ناکامیوں پہ شور مچایا نہیں کبھی