mera junun hi asl mein sahra-parast tha

merā junūñ hī asl meñ sahrā-parast thā

varna bahār kā bhī yahāñ bandobast thā

aayā shu.ūr-e-zīst to ifshā huā ye raaz

tere kalām-e-fan kī maiñ pahlī shikast thā

auroñ ne kar liye the añdheroñ se faisle

ik maiñ hī saare shahr meñ sūraj-ba-dast thā

ik chīḳhte sukūt ne chauñkā diyā mujhe

maiñ varna apne haal meñ muddat se mast thā

ā.īna jab dikhāyā to ye raaz bhī khulā

jitnā bhī jo buland thā utnā hī past thā

taḳhlīq-e-kul ke lamha-e-avval meñ ai 'asar'

maiñ zindagī kī pahlī humak pahlī jast thā

mera junun hi asl mein sahra-parast tha

warna bahaar ka bhi yahan bandobast tha

aaya shuur-e-zist to ifsha hua ye raaz

tere kalam-e-fan ki main pahli shikast tha

auron ne kar liye the andheron se faisle

ek main hi sare shahr mein suraj-ba-dast tha

ek chiKHte sukut ne chaunka diya mujhe

main warna apne haal mein muddat se mast tha

aaina jab dikhaya to ye raaz bhi khula

jitna bhi jo buland tha utna hi past tha

taKHliq-e-kul ke lamha-e-awwal mein ai 'asar'

main zindagi ki pahli humak pahli jast tha