mere alfaz se aati hai us dil-dar ki KHushbu

mere alfāz se aatī hai us dil-dār kī ḳhushbū

suḳhan-var huuñ chhupā saktā nahīñ maiñ pyaar kī ḳhushbū

mahaktī haiñ mirī tanhā.iyāñ us shoḳh ke dam se

mo.attar kar rahī mujh ko ḳhayāl-e-yār kī ḳhushbū

chamaktī aañkh surḳhī thartharāte lab mahaktī shab

mujhe in sab se aatī hai visāl-e-yār kī ḳhushbū

isī ummīd par jānam tumhāre shahr aaya huuñ

atā ho be-qarārī ko zarā dīdār kī ḳhushbū

tumhārī ek ḳhāmoshī ishāra kar ga.ī mujh ko

ki aTkī hai kahāñ par lazzat-e-iz.hār kī ḳhushbū

mujhe mahsūs hotī hai zamāne kī satā.ish meñ

maza hai jab nazar aa.e mire kirdār kī ḳhushbū

mere alfaz se aati hai us dil-dar ki KHushbu

suKHan-war hun chhupa sakta nahin main pyar ki KHushbu

mahakti hain meri tanhaiyan us shoKH ke dam se

moattar kar rahi mujh ko KHayal-e-yar ki KHushbu

chamakti aankh surKHi thartharaate lab mahakti shab

mujhe in sab se aati hai visal-e-yar ki KHushbu

isi ummid par jaanam tumhaare shahr aaya hun

ata ho be-qarari ko zara didar ki KHushbu

tumhaari ek KHamoshi ishaara kar gai mujh ko

ki aTki hai kahan par lazzat-e-izhaar ki KHushbu

mujhe mahsus hoti hai zamane ki sataish mein

maza hai jab nazar aae mere kirdar ki KHushbu