میرے الفاظ سے آتی ہے اس دل دار کی خوشبو

میرے الفاظ سے آتی ہے اس دل دار کی خوشبو

سخن ور ہوں چھپا سکتا نہیں میں پیار کی خوشبو

مہکتی ہیں مری تنہائیاں اس شوخ کے دم سے

معطر کر رہی مجھ کو خیال یار کی خوشبو

چمکتی آنکھ سرخی تھرتھراتے لب مہکتی شب

مجھے ان سب سے آتی ہے وصال یار کی خوشبو

اسی امید پر جانم تمہارے شہر آیا ہوں

عطا ہو بے قراری کو ذرا دیدار کی خوشبو

تمہاری ایک خاموشی اشارہ کر گئی مجھ کو

کہ اٹکی ہے کہاں پر لذت اظہار کی خوشبو

مجھے محسوس ہوتی ہے زمانہ کی ستائش میں

مزہ ہے جب نظر آئے مرے کردار کی خوشبو