mere andar hi kahin aaya tha tufan mera

mere andar hī kahīñ aayā thā tūfān mirā

dekhte dekhte dil ho gayā vīrān mirā

mujhe kho kar tirī āñkheñ nahīñ pahle jaisī

tere nuqsān se baḌh kar hai ye nuqsān mirā

ye samundar ki jo ab milne-milāne se gayā

ga.e vaqtoñ meñ huā kartā thā mehmān mirā

ek duniyā meñ simaT aa.e ye mumkin hī nahīñ

itnī duniyāoñ meñ bikhrā huā sāmān mirā

maiñ ne is tarh bhī us shaḳhs kā rakkhā hai ḳhayāl

kahīñ jaatā hī nahīñ apne sivā dhyān mirā

mujhe āġhāz meñ kuchh aise ishāre mile the

maiñ na hotā to kahāñ jaatā bayābān mirā

maiñ ne do hāthoñ kā saaya sā banāyā jin par

un daraḳhtoñ ne uThāyā nahīñ ehsān mirā

merī chup shor banī shor se kuchh aur banī

ek ik kar ke huā ḳhatm har imkān mirā

is mohabbat pe maiñ itnā hī kahūñgā 'shāhīn'

ik sitāre ne safar kar diyā āsān mirā

mere andar hi kahin aaya tha tufan mera

dekhte dekhte dil ho gaya viran mera

mujhe kho kar teri aankhen nahin pahle jaisi

tere nuqsan se baDh kar hai ye nuqsan mera

ye samundar ki jo ab milne-milane se gaya

gae waqton mein hua karta tha mehman mera

ek duniya mein simaT aae ye mumkin hi nahin

itni duniyaon mein bikhra hua saman mera

main ne is tarh bhi us shaKHs ka rakkha hai KHayal

kahin jata hi nahin apne siwa dhyan mera

mujhe aaghaz mein kuchh aise ishaare mile the

main na hota to kahan jata bayaban mera

main ne do hathon ka saya sa banaya jin par

un daraKHton ne uThaya nahin ehsan mera

meri chup shor bani shor se kuchh aur bani

ek ek kar ke hua KHatm har imkan mera

is mohabbat pe main itna hi kahunga 'shahin'

ek sitare ne safar kar diya aasan mera