میرے دل کو مصیبت جھیل کر آرام آتا ہے

میرے دل کو مصیبت جھیل کر آرام آتا ہے

یہ وہ طائر ہے جو خود اڑ کے زیر دام آتا ہے

نشیمن چھوٹنے پر بھی کہاں آرام آتا ہے

قفس میں بھی رہائی کا خیال خام آتا ہے

کبھی تھی فکر پینے کی مگر اب فکر ہے پی کر

بہکتا ہوں تو میرے ظرف پر الزام آتا ہے

مری مجبوریاں بنتی ہیں جب بھی پاؤں کی بیڑی

تو پھر اس وقت میرا شوق میرے کام آتا ہے

خبر کیا تھی تری دریا دلی مخصوص ہے ساقی

مرے حصے میں جب آتا ہے خالی جام آتا ہے

صراحی آ گئی ساقی بھی آیا جم چکی محفل

مگر یہ دیکھنا ہے رقص میں کب جام آتا ہے

کوئی اے سوزؔ کچھ کہتا نہیں ہے شمع محفل کو

پتنگے ہی کے سر جلنے کا بھی الزام آتا ہے