میرے ہی جیسا کوئی اس پار تھا

میرے ہی جیسا کوئی اس پار تھا

آنکھ تھی یا روزن دیوار تھا

الٹی جانب بہہ رہی تھیں کشتیاں

اور ہوا کے ہاتھ میں پتوار تھا

آنکھ اٹھا کر دیکھتا کیوں عکس کو

آئنہ کا بھی کوئی معیار تھا

پاؤں دھرنے کو ملی ایسی زمیں

پاؤں دھرنا بھی جہاں دشوار تھا

بات کرتے جا رہے تھے آئنہ

محو حیرت آئنہ بردار تھا

دیکھتا رہتا تھا آنکھیں موند کر

نیند میں تھا یا کوئی بیدار تھا

پوچھتے ہو کیا بلندی کا سبب

زیر پا آصفؔ فراز دار تھا