میرے ہونٹوں پہ مری آہ و فغاں ہے جاناں

میرے ہونٹوں پہ مری آہ و فغاں ہے جاناں

لوگ کہتے ہیں بڑی تلخ زباں ہے جاناں

جانتے ہیں کہ محبت کا مرض ہے مجھ کو

پوچھ لیتے ہیں مگر درد کہاں ہے جاناں

داس لگتے ہیں یہ دنیا کے سخنور تیرے

تیری باتوں کا وہ انداز بیاں ہے جاناں

کہہ کے پتھر جسے دنیا نے لگا دی ٹھوکر

وہ مرا دل ہے محبت کا مکاں ہے جاناں

درد دیوار پہ مندر کی لکھی چوپائی

آہ میری کسی مسجد کی اذاں ہے جاناں

کر کے گھائل مجھے معصوم بنی بیٹھی ہے

تیری آنکھوں پہ جو پلکوں کی کماں ہے جاناں

میرے سینے پہ ذرا دست حنا رکھ دو تم

دل میں اب عشق کا خورشید جواں ہے جاناں

کر لی مہتاب نے یہ دیکھ کے راتیں کالی

تیرے ہونٹوں پہ جو اک تل کا نشاں ہے جاناں

تیری آنکھوں میں مرے دونوں جہاں بستے ہیں

تیرے قدموں پہ لگی خاک میں جاں ہے جاناں