mere kandhon pe rahe karte rahe sunwai

mere kāñdhoñ pe rahe karte rahe sunvā.ī

par farishtoñ ne mirī baat nahīñ pahuñchā.ī

dauḌtī hāñptī aa.ī thī udāsī mujh tak

mere siine se lagī aur zarā sustā.ī

zindagī thak nahīñ saktī hai ki chalnā hai ise

dar-ba-dar ghūmtī rahtī hai mirī Thukrā.ī

aa.ina bas vo dikhātā hai jo ham chāhte haiñ

aur ham kab hī dikhāte haiñ ise sachchā.ī

do ḳhalā ek barābar haiñ mire siine meñ

jabki mumkin hī nahīñ ek kī bhī bharpā.ī

rone vaalo zarā āvāz ko nīchā rakkho

kyā mazā aa.egā āvāz agar bharrā.ī

ek ham ḳhud ke haiñ ik ghar ke haiñ ik duniyā ke

tum agar pā bhī sakoge to hameñ chauthā.ī

mere kandhon pe rahe karte rahe sunwai

par farishton ne meri baat nahin pahunchai

dauDti hanpti aai thi udasi mujh tak

mere sine se lagi aur zara sustai

zindagi thak nahin sakti hai ki chalna hai ise

dar-ba-dar ghumti rahti hai meri Thukrai

aaina bas wo dikhata hai jo hum chahte hain

aur hum kab hi dikhate hain ise sachchai

do KHala ek barabar hain mere sine mein

jabki mumkin hi nahin ek ki bhi bharpai

rone walo zara aawaz ko nicha rakkho

kya maza aaega aawaz agar bharrai

ek hum KHud ke hain ek ghar ke hain ek duniya ke

tum agar pa bhi sakoge to hamein chauthai