mere liye to harf-e-dua ho gaya wo shaKHs

mere liye to harf-e-duā ho gayā vo shaḳhs

saare dukhoñ kī jaise davā ho gayā vo shaḳhs

maiñ āsmāñ pe thā to zamīñ kī kashish thā vo

utrā zamīn par to havā ho gayā vo shaḳhs

sochūñ bhī ab use to taḳhayyul ke par jaleñ

mujh se judā huā to ḳhudā ho gayā vo shaḳhs

sab ashk pī gayā mire andar kā aadmī

maiñ ḳhushk ho gayā huuñ harā ho gayā vo shaḳhs

maiñ us kā haath dekh rahā thā ki daf.atan

simTā simaT ke rañg-e-hinā ho gayā vo shaḳhs

yuuñ bhī nahīñ ki paas hai mere vo ham-nafas

ye bhī ġhalat ki mujh se judā ho gayā vo shaḳhs

paḌhtā thā maiñ namāz samajh kar use 'rashīd'

phir yuuñ huā ki mujh se qazā ho gayā vo shaḳhs

mere liye to harf-e-dua ho gaya wo shaKHs

sare dukhon ki jaise dawa ho gaya wo shaKHs

main aasman pe tha to zamin ki kashish tha wo

utra zamin par to hawa ho gaya wo shaKHs

sochun bhi ab use to taKHayyul ke par jalen

mujh se juda hua to KHuda ho gaya wo shaKHs

sab ashk pi gaya mere andar ka aadmi

main KHushk ho gaya hun hara ho gaya wo shaKHs

main us ka hath dekh raha tha ki dafatan

simTa simaT ke rang-e-hina ho gaya wo shaKHs

yun bhi nahin ki pas hai mere wo ham-nafas

ye bhi ghalat ki mujh se juda ho gaya wo shaKHs

paDhta tha main namaz samajh kar use 'rashid'

phir yun hua ki mujh se qaza ho gaya wo shaKHs