mere mahbub mere dil ko jalaya na karo

mere mahbūb mire dil ko jalāyā na karo

saaz chheḌā na karo giit sunāyā na karo

jaao ābād karo apnī tamannāoñ ko

mujh ko mahfil kā tamāshā.ī banāyā na karo

merī rāhoñ meñ jo kāñTe haiñ to kyuuñ phuul mileñ

mere dāman ko ulajhne do chhuḌāyā na karo

tum ne achchhā hī kiyā saath hamārā na diyā

bujh chuke haiñ jo diye un ko jalāyā na karo

mere jaisā koī pāgal na kahīñ mil jaa.e

tum kisī moḌ pe tanhā kabhī jaayā na karo

ye to duniyā hai sabhī qism ke haiñ log yahāñ

har kisī ke liye tum aañkh bichhāyā na karo

zahr-e-ġham pī ke bhī kuchh log jiyā karte haiñ

un ko chheḌā na karo un ko satāyā na karo

mere mahbub mere dil ko jalaya na karo

saz chheDa na karo git sunaya na karo

jao aabaad karo apni tamannaon ko

mujh ko mahfil ka tamashai banaya na karo

meri rahon mein jo kanTe hain to kyun phul milen

mere daman ko ulajhne do chhuDaya na karo

tum ne achchha hi kiya sath hamara na diya

bujh chuke hain jo diye un ko jalaya na karo

mere jaisa koi pagal na kahin mil jae

tum kisi moD pe tanha kabhi jaya na karo

ye to duniya hai sabhi qism ke hain log yahan

har kisi ke liye tum aankh bichhaya na karo

zahr-e-gham pi ke bhi kuchh log jiya karte hain

un ko chheDa na karo un ko sataya na karo