میرے نہ ہوئیے مجھے اپنا نہ کیجئے

میرے نہ ہوئیے مجھے اپنا نہ کیجئے

لیکن مذاق حسن کو رسوا نہ کیجئے

دل تو یہ کہہ رہا ہے کہ ان سے گلہ کروں

غیرت یہ کہہ رہی ہے کہ شکوہ نہ کیجئے

ٹوٹے گا نفس کا یہ تسلسل خبر نہیں

چلتی ہوئی ہوا کا بھروسہ نہ کیجئے

ظالم سے گلستاں کو بچانا ضرور ہے

کچھ گل مسل گئے ہیں تو پروا نہ کیجئے

ہے آج تیز دھوپ میں ہمت کا امتحاں

اس وقت آپ زلف کا سایہ نہ کیجئے

مظہرؔ وہ بت کدہ ہو کلیسا ہو یا حرم

جب تک نہ دل جھکے کہیں سجدہ نہ کیجئے