mere qarib aae wo aa kar chale gae

mere qarīb aa.e vo aa kar chale ga.e

sau ārzūeñ dil meñ jagā kar chale ga.e

āñkheñ lahū bahātī haiñ tā'bīr ke liye

tum to sunahre ḳhvāb dikhā kar chale ga.e

rusvā.iyāñ tumhārī gavārā na thiiñ so ham

mahfil se apne zaḳhm chhupā kar chale ga.e

chilman se jhāñktā huā chehra dikhā ke vo

kuchh aur shauq-e-dīd baḌhā kar chale ga.e

ehsās kā 'azāb rahā ham pe raat bhar

ahbāb apnā dard sunā kar chale ga.e

hasrat se duur tak unheñ taktī rahī nigāh

'maḳhmūr' vo nigāh churā kar chale ga.e

mere qarib aae wo aa kar chale gae

sau aarzuen dil mein jaga kar chale gae

aankhen lahu bahati hain ta'bir ke liye

tum to sunahre KHwab dikha kar chale gae

ruswaiyan tumhaari gawara na thin so hum

mahfil se apne zaKHm chhupa kar chale gae

chilman se jhankta hua chehra dikha ke wo

kuchh aur shauq-e-did baDha kar chale gae

ehsas ka 'azab raha hum pe raat bhar

ahbab apna dard suna kar chale gae

hasrat se dur tak unhen takti rahi nigah

'maKHmur' wo nigah chura kar chale gae