mere tamam faisle ai chaaragar na kar

mere tamām faisle ai chārāgar na kar

ye merī zindagī hai ise tū basar na kar

dekhā basā liiñ bastiyāñ maiñ ne jagah jagah

tujh se kahā nahīñ thā mujhe dar-ba-dar na kar

ai manzil-e-gumāñ ke musāfir Thahar zarā

mere ḳhayāl-o-ḳhvāb se bāhar safar na kar

aisā na ho ki terī tarah bolne lagūñ

ai chup mire mizāj par itnā asar na kar

bas iltijā hai ye ki na be-daḳhl kar mujhe

maiñ ne ye kab kahā hai mire dil meñ ghar na kar

achchhā hai iḳhtisār magar dāstāñ-navīs

tū dāstān-e-shauq mirī muḳhtasar na kar

jo shaḳhs ek saañs Thahartā nahīñ kahīñ

kyoñ mujh se kah rahā hai musalsal safar na kar

'āsim' dimāġh ko na mohabbat meñ kar niDhāl

dil kā hai kaam jaan mirī soch kar na kar

mere tamam faisle ai chaaragar na kar

ye meri zindagi hai ise tu basar na kar

dekha basa lin bastiyan main ne jagah jagah

tujh se kaha nahin tha mujhe dar-ba-dar na kar

ai manzil-e-guman ke musafir Thahar zara

mere KHayal-o-KHwab se bahar safar na kar

aisa na ho ki teri tarah bolne lagun

ai chup mere mizaj par itna asar na kar

bas iltija hai ye ki na be-daKHl kar mujhe

main ne ye kab kaha hai mere dil mein ghar na kar

achchha hai iKHtisar magar dastan-nawis

tu dastan-e-shauq meri muKHtasar na kar

jo shaKHs ek sans Thaharta nahin kahin

kyon mujh se kah raha hai musalsal safar na kar

'asim' dimagh ko na mohabbat mein kar niDhaal

dil ka hai kaam jaan meri soch kar na kar