mere wujud ki tanhai mein khile hain tere moattar hath

mere vujūd kī tanhā.ī meñ khile haiñ tere mo'attar haath

jaise jhiil pe raqs-kunāñ hoñ nīl-kamal ke munavvar haath

us ke husn meñ Duub ke dekho to ye lagtā hai jaise

āñkhoñ ke andar haiñ āñkheñ aur hāthoñ ke bhītar haath

ḳhāliq kā apnī taḳhlīq se saath nahīñ chhuTtā hai kabhī

jaise ḳhud patthar ke sanam meñ rah jaate haiñ Dhal kar haath

bāzāroñ meñ kaisā-kaisā mushk chhupā.e phirtā huuñ

bas jaate haiñ jab ḳhushbū meñ terī zulf ko chhū kar haath

merā apnā hī to lahū hai koī inheñ qātil na kahe

lā mere zaḳhmoñ par rakh de yaar apne ye sitamgar haath

ye be-nūr āñkhoñ sā kāġhaz kab se hai vīrān paḌā

band nuzūl-e-she'r-o-suḳhan hai afsurda haiñ payambar haath

mere fan ko parakhne vaalo pahle kalām meñ Duubo to

sāhil-e-bahr pe DhūñDhe se kab 'zeb' aatā hai gauhar haath

mere wujud ki tanhai mein khile hain tere mo'attar hath

jaise jhil pe raqs-kunan hon nil-kamal ke munawwar hath

us ke husn mein Dub ke dekho to ye lagta hai jaise

aankhon ke andar hain aankhen aur hathon ke bhitar hath

KHaliq ka apni taKHliq se sath nahin chhuTta hai kabhi

jaise KHud patthar ke sanam mein rah jate hain Dhal kar hath

bazaron mein kaisa-kaisa mushk chhupae phirta hun

bas jate hain jab KHushbu mein teri zulf ko chhu kar hath

mera apna hi to lahu hai koi inhen qatil na kahe

la mere zaKHmon par rakh de yar apne ye sitamgar hath

ye be-nur aankhon sa kaghaz kab se hai viran paDa

band nuzul-e-she'r-o-suKHan hai afsurda hain payambar hath

mere fan ko parakhne walo pahle kalam mein Dubo to

sahil-e-bahr pe DhunDhe se kab 'zeb' aata hai gauhar hath