meri buniyaad ko tamir se pahchana jae

merī buniyād ko tā'mīr se pahchānā jaa.e

mujh ko 'ujlat nahīñ tāḳhīr se pahchānā jaa.e

maiñ ka.ī shakl meñ rahtā huuñ badan par apne

merā chehra mirī tahrīr se pahchānā jaa.e

koī samjhe mirī ḳhāmosh nigāhoñ kī sadā

dard merā mirī tasvīr se pahchānā jaa.e

aañkh kā dekhā huā jhūTh bhī ho saktā hai

ḳhvāb ko ḳhvāb kī tā'bīr se pahchānā jaa.e

maiñ ne paanī ke liye ret uḌaa.ī hai bahut

merī taqdīr ko tadbīr se pahchānā jaa.e

mere kāñdhe se utāre na koī merī salīb

jurm merā mirī tā'zīr se pahchānā jaa.e

is añdhere meñ ye jhankār hai sham'oñ kī tarah

yā'nī mujh ko mirī zanjīr se pahchānā jaa.e

merā sab kuchh mire maazī ke havāle se hai

mere mangal ko mire piir se pahchānā jaa.e

meri buniyaad ko ta'mir se pahchana jae

mujh ko 'ujlat nahin taKHir se pahchana jae

main kai shakl mein rahta hun badan par apne

mera chehra meri tahrir se pahchana jae

koi samjhe meri KHamosh nigahon ki sada

dard mera meri taswir se pahchana jae

aankh ka dekha hua jhuTh bhi ho sakta hai

KHwab ko KHwab ki ta'bir se pahchana jae

main ne pani ke liye ret uDai hai bahut

meri taqdir ko tadbir se pahchana jae

mere kandhe se utare na koi meri salib

jurm mera meri ta'zir se pahchana jae

is andhere mein ye jhankar hai sham'on ki tarah

ya'ni mujh ko meri zanjir se pahchana jae

mera sab kuchh mere mazi ke hawale se hai

mere mangal ko mere pir se pahchana jae