meri haalat dekhiye aur unki surat dekhiye

merī hālat dekhiye aur un kī sūrat dekhiye

phir nigāh-e-ġhaur se qānūn-e-qudrat dekhiye

sair-e-mahtāb-o-kavākib se tabassum tā-bake

ro rahī hai vo kisī kī sham-e-turbat dekhiye

aap ik jalva sarāsar maiñ sarāpā ik nazar

apnī hājat dekhiye merī zarūrat dekhiye

apne sāmān-e-ta.ayyush se agar fursat mile

bekasoñ kā bhī kabhī tarz-e-ma.īshat dekhiye

muskurā kar is tarah aayā na kiije sāmne

kis qadar kamzor huuñ maiñ merī sūrat dekhiye

aap ko laayā huuñ vīrānoñ meñ ibrat ke liye

hazrat-e-dil dekhiye apnī haqīqat dekhiye

sirf itne ke liye āñkheñ hameñ baḳhshī ga.iiñ

dekhiye duniyā ke manzar aur ba-ibrat dekhiye

maut bhī aa.ī to chehre par tabassum hī rahā

zabt par hai kis qadar ham ko bhī qudrat dekhiye

ye bhī koī baat hai har vaqt daulat kā ḳhayāl

aadmī haiñ aap agar to ādmiyat dekhiye

phuuT niklegā jabīñ se ek chashma husn kā

sub.h uTh kar ḳhanda-e-sāmān-e-qudrat dekhiye

rash.ha-e-shabnam bahār-e-gul faroġh-e-mehr-o-māh

vaah kyā ash.ār haiñ dīvān-e-fitrat dekhiye

is se baḌh kar aur ibrat kā sabaq mumkin nahīñ

jo nashāt-e-zindagī the un kī turbat dekhiye

thī ḳhatā un kī magar jab aa ga.e vo sāmne

jhuk ga.iiñ merī hī āñkheñ rasm-e-ulfat dekhiye

ḳhush-numā yā bad-numā ho dahr kī har chiiz meñ

'josh' kī taḳh.īl kahtī hai ki nudrat dekhiye

meri haalat dekhiye aur un ki surat dekhiye

phir nigah-e-ghaur se qanun-e-qudrat dekhiye

sair-e-mahtab-o-kawakib se tabassum ta-bake

ro rahi hai wo kisi ki sham-e-turbat dekhiye

aap ek jalwa sarasar main sarapa ek nazar

apni hajat dekhiye meri zarurat dekhiye

apne saman-e-tayyush se agar fursat mile

bekason ka bhi kabhi tarz-e-maishat dekhiye

muskura kar is tarah aaya na kije samne

kis qadar kamzor hun main meri surat dekhiye

aap ko laya hun viranon mein ibrat ke liye

hazrat-e-dil dekhiye apni haqiqat dekhiye

sirf itne ke liye aankhen hamein baKHshi gain

dekhiye duniya ke manzar aur ba-ibrat dekhiye

maut bhi aai to chehre par tabassum hi raha

zabt par hai kis qadar hum ko bhi qudrat dekhiye

ye bhi koi baat hai har waqt daulat ka KHayal

aadmi hain aap agar to aadmiyat dekhiye

phuT niklega jabin se ek chashma husn ka

subh uTh kar KHanda-e-saman-e-qudrat dekhiye

rashha-e-shabnam bahaar-e-gul farogh-e-mehr-o-mah

wah kya ashaar hain diwan-e-fitrat dekhiye

is se baDh kar aur ibrat ka sabaq mumkin nahin

jo nashat-e-zindagi the un ki turbat dekhiye

thi KHata un ki magar jab aa gae wo samne

jhuk gain meri hi aankhen rasm-e-ulfat dekhiye

KHush-numa ya bad-numa ho dahr ki har chiz mein

'josh' ki taKHil kahti hai ki nudrat dekhiye