meri kashti TuT rahi hai sar se uncha pani hai

merī kashtī TuuT rahī hai sar se ūñchā paanī hai

paanī kāTte jīvan biitā phir bhī kitnā paanī hai

tum bhī ḳhush ho apne ghar meñ aur maiñ apne samundar meñ

apnī apnī miTTī hai aur apnā apnā paanī hai

tum ik naddī tum ik dariyā is se aage kyā ho tum

jitnā tum ne soch rakhā hai us se ziyāda paanī hai

khulā samundar merā ghar hai merī qabr bhī ho to kyā

bāzuoñ jaisī lahreñ haiñ aur āñkhoñ jaisā paanī hai

itnī sachchī aisī mukammal tanhā.ī kab dekhī thī

duur duur tak koī nahīñ hai sūraj hai yā paanī hai

jaane 'umr ke kis hisse meñ us par ye ahvāl khule

us kī kahānī miTTī hai aur merā qissa paanī hai

ik laḌkī kā chehra 'sarvat' dil kī tahoñ meñ tair gayā

TūTte bante sāhil haiñ aur jhaag uḌātā paanī hai

meri kashti TuT rahi hai sar se uncha pani hai

pani kaTte jiwan bita phir bhi kitna pani hai

tum bhi KHush ho apne ghar mein aur main apne samundar mein

apni apni miTTi hai aur apna apna pani hai

tum ek naddi tum ek dariya is se aage kya ho tum

jitna tum ne soch rakha hai us se ziyaada pani hai

khula samundar mera ghar hai meri qabr bhi ho to kya

bazuon jaisi lahren hain aur aankhon jaisa pani hai

itni sachchi aisi mukammal tanhai kab dekhi thi

dur dur tak koi nahin hai suraj hai ya pani hai

jaane 'umr ke kis hisse mein us par ye ahwal khule

us ki kahani miTTi hai aur mera qissa pani hai

ek laDki ka chehra 'sarwat' dil ki tahon mein tair gaya

TuTte bante sahil hain aur jhag uData pani hai