meri miTTi mein tamazat ke KHazane kya the

merī miTTī meñ tamāzat ke ḳhazāne kyā the

bujhtī āñkhoñ meñ kabhī ḳhvāb suhāne kyā the

ai mire shahr batā tū ne to sab dekhā hai

merā bachpan mire aabā ke zamāne kyā the

maiñ nahīñ thī to ye phir kaun thā reza reza

terī tā'mīr meñ āsār purāne kyā the

le gayā kyoñ mirī ḳhushbū ko churā kar mausam

ik sivā us ke mire paas ḳhazāne kyā the

jism par ho koī chehra to maiñ pahchān sakūñ

vo na miTTī the na patthar the na jaane kyā the

us ne sandal kī mahak chhoḌ dī hāthoñ meñ mire

us ke likkhe hue alfāz na jaane kyā the

maiñ thī patthar to kabhī toḌ ke dekhā hotā

'umr bhar mujh ko samajhne ke bahāne kyā the

meri miTTi mein tamazat ke KHazane kya the

bujhti aankhon mein kabhi KHwab suhane kya the

ai mere shahr bata tu ne to sab dekha hai

mera bachpan mere aaba ke zamane kya the

main nahin thi to ye phir kaun tha reza reza

teri ta'mir mein aasar purane kya the

le gaya kyon meri KHushbu ko chura kar mausam

ek siwa us ke mere pas KHazane kya the

jism par ho koi chehra to main pahchan sakun

wo na miTTi the na patthar the na jaane kya the

us ne sandal ki mahak chhoD di hathon mein mere

us ke likkhe hue alfaz na jaane kya the

main thi patthar to kabhi toD ke dekha hota

'umr bhar mujh ko samajhne ke bahane kya the