میری مٹی میں تمازت کے خزانے کیا تھے

میری مٹی میں تمازت کے خزانے کیا تھے

بجھتی آنکھوں میں کبھی خواب سہانے کیا تھے

اے مرے شہر بتا تو نے تو سب دیکھا ہے

میرا بچپن مرے آبا کے زمانے کیا تھے

میں نہیں تھی تو یہ پھر کون تھا ریزہ ریزہ

تیری تعمیر میں آثار پرانے کیا تھے

لے گیا کیوں مری خوشبو کو چرا کر موسم

اک سوا اس کے مرے پاس خزانے کیا تھے

جسم پر ہو کوئی چہرہ تو میں پہچان سکوں

وہ نہ مٹی تھے نہ پتھر تھے نہ جانے کیا تھے

اس نے صندل کی مہک چھوڑ دی ہاتھوں میں مرے

اس کے لکھے ہوئے الفاظ نہ جانے کیا تھے

میں تھی پتھر تو کبھی توڑ کے دیکھا ہوتا

عمر بھر مجھ کو سمجھنے کے بہانے کیا تھے