میری راتوں میں تیری صورت ہے

میری راتوں میں تیری صورت ہے

اب کسے چاند کی ضرورت ہے

جان کھو کر ہی جان پایا ہوں

موت ہی ایک بس حقیقت ہے

میرے حصے میں تیری یادیں ہیں

سب کے حصے میں تیری چاہت ہے

پھر سر شام کھل گئیں زلفیں

آج پھر شام ہی سے شامت ہے

قتل ہوتا ہوں مسکراتا ہوں

تیرے ہاتھوں میں وہ نزاکت ہے

زندگی زندگی کو کیا دے گی

وہ تو خود موت کی امانت ہے

زندگی کی دعائیں دیتے ہو

سانس لینے کی کس کو فرصت ہے

تاجؔ پر یہ سجاوٹیں دیکھو

سنگ الفت پہ رنگ دولت ہے