meri wahshat ka jo afsana banaya hota

merī vahshat kā jo afsāna banāyā hotā

sunñe vāloñ ko bhī dīvāna banāyā hotā

un ke laane kī na sūjhī tujhe qāsid tadbīr

jhuuT sach koī to afsāna banāyā hotā

dekhte tum ki sañvar jaate na gesū kaise

merī palkoñ kā agar shāna banāyā hotā

mar ke bhī ruuh na piine ko tarastī saaqī

merī miTTī se jo paimāna banāyā hotā

tum ne zulfoñ ko banā kar hameñ dīvāna kiyā

kyā bigaḌtā thā tumhārā na banāyā hotā

dil jo vaa.iz kā banāyā thā ilāhī patthar

kaash sañg-e-dar-e-mai-ḳhāna banāyā hotā

dil-e-vahshī jo chhuTā mujh se bahut ḳhuub huā

varna ab tak mujhe dīvāna banāyā hotā

vus.at-e-dil jo koī pīr-e-muġhāñ dikhlāyā

ek ik jaam ko mai-ḳhāna banāyā hotā

muñh se āñchal jo haTātā vo sar-e-bazm 'jalīl'

ba-ḳhudā sham.a ko parvāna banāyā hotā

meri wahshat ka jo afsana banaya hota

sunne walon ko bhi diwana banaya hota

un ke lane ki na sujhi tujhe qasid tadbir

jhuT sach koi to afsana banaya hota

dekhte tum ki sanwar jate na gesu kaise

meri palkon ka agar shana banaya hota

mar ke bhi ruh na pine ko tarasti saqi

meri miTTi se jo paimana banaya hota

tum ne zulfon ko bana kar hamein diwana kiya

kya bigaDta tha tumhaara na banaya hota

dil jo waiz ka banaya tha ilahi patthar

kash sang-e-dar-e-mai-KHana banaya hota

dil-e-wahshi jo chhuTa mujh se bahut KHub hua

warna ab tak mujhe diwana banaya hota

wusat-e-dil jo koi pir-e-mughan dikhlaya

ek ek jam ko mai-KHana banaya hota

munh se aanchal jo haTata wo sar-e-bazm 'jalil'

ba-KHuda shama ko parwana banaya hota