mil ke yun sab ke samne mat kar KHajil mujhe

mil ke yuuñ sab ke sāmne mat kar ḳhajil mujhe

tū sab se mil rahā hai so hargiz na mil mujhe

maujūdgī mirī na khulī tujh pe varna to

laayā hai bārhā tirī jānib ye dil mujhe

bām-e-ḳhayāl par mire aatī haiñ titliyāñ

aatā hai yaad jab bhī tirā shoḳh til mujhe

shauq-e-musāfirat ho tirī ḳhair kyā karūñ

ik aañkh kar ke baiThī hai phir pā-ba-gil mujhe

jī chāhtā hai noch luuñ dīvār-o-dar ke naqsh

kartī hai be-ruḳhī yuuñ tirī mushta'il mujhe

ab ai nigār-e-vaqt koī shart hī nahīñ

tū 'ārzī mile yā mile mustaqil mujhe

rashk-e-jahān hotī mire zaḳhm kī numūd

miltā 'hayā' jo mausam-e-gul mo'tadil mujhe

mil ke yun sab ke samne mat kar KHajil mujhe

tu sab se mil raha hai so hargiz na mil mujhe

maujudgi meri na khuli tujh pe warna to

laya hai barha teri jaanib ye dil mujhe

baam-e-KHayal par mere aati hain titliyan

aata hai yaad jab bhi tera shoKH til mujhe

shauq-e-musafirat ho teri KHair kya karun

ek aankh kar ke baiThi hai phir pa-ba-gil mujhe

ji chahta hai noch lun diwar-o-dar ke naqsh

karti hai be-ruKHi yun teri mushta'il mujhe

ab ai nigar-e-waqt koi shart hi nahin

tu 'arzi mile ya mile mustaqil mujhe

rashk-e-jahan hoti mere zaKHm ki numud

milta 'haya' jo mausam-e-gul mo'tadil mujhe