mili na fursat jahan ho ghash se uThi jo kuchh bhi naqab-e-ariz

milī na fursat jahāñ ho ġhash se uThī jo kuchh bhī naqāb-e-āriz

magar samajhte nahīñ abhī tak tum apnā jalva hijāb-e-āriz

na dasht-e-aiman meñ zikr us kā na tuur hī par kabhī ye chamkā

na ho nazar meñ jo terā jalva to mehr ko duuñ ḳhitāb-e-āriz

tasavvur un kā hai mujh ko har-dam na shab ko taskīñ na chain din ko

hoī haiñ auqāt mere bilkul tabāh kākul ḳharāb-e-āriz

ḳhushī kī kasrat agar ho un ko to ban ke āñkhoñ meñ aa.eñ aañsū

ziyāda yaañ tak haiñ apnī had se na Thahre aariz meñ āb-e-āriz

ye rañg-e-bazm-e-adū to dekho ki laakh parde kiye haiñ haa.il

naqāb uThā.e vo go haiñ baiThe magar hai ġhairat hijāb-e-āriz

ilāhī merī jigar-fagārī raqīb sun kar unheñ sunā deñ

vo maslahat hī samajh ke aa.eñ dikhāne ko māhtāb-e-āriz

nazar fazā hai jahāñ hai jalva tumhārā ehsān sab pe hogā

uThāo aariz se tum jo parda to ghaT na jā.egī tāb-e-āriz

ye naam jis kā qamar rakhā hai mujhī se ik daaġh le gayā hai

samajh to dekho samajh rahā hai falak usī ko javāb-e-āriz

kahīñ ilāhī shab-e-judā.ī tamām hone ko aa ga.ī hai

numūd-e-sub.h-e-jazā ho shāyad ki maiñ ne dekhā hai ḳhvāb-e-āriz

huī ye hāl-e-zabūñ kī shohrat ki us ne ḳhajlat se muñh chhupāyā

banā hai rañg-e-shikasta merā bahut dinoñ meñ naqāb-e-āriz

na pūchho ham se ki kyā sabab hai siyāh rozī kā apnī 'sālik'

chamak rahā hai bahut dinoñ se adū pe vo āftāb-e-āriz

mili na fursat jahan ho ghash se uThi jo kuchh bhi naqab-e-ariz

magar samajhte nahin abhi tak tum apna jalwa hijab-e-ariz

na dasht-e-aiman mein zikr us ka na tur hi par kabhi ye chamka

na ho nazar mein jo tera jalwa to mehr ko dun KHitab-e-ariz

tasawwur un ka hai mujh ko har-dam na shab ko taskin na chain din ko

hoi hain auqat mere bilkul tabah kakul KHarab-e-ariz

KHushi ki kasrat agar ho un ko to ban ke aankhon mein aaen aansu

ziyaada yan tak hain apni had se na Thahre aariz mein aab-e-ariz

ye rang-e-bazm-e-adu to dekho ki lakh parde kiye hain hail

naqab uThae wo go hain baiThe magar hai ghairat hijab-e-ariz

ilahi meri jigar-fagari raqib sun kar unhen suna den

wo maslahat hi samajh ke aaen dikhane ko mahtab-e-ariz

nazar faza hai jahan hai jalwa tumhaara ehsan sab pe hoga

uThao aariz se tum jo parda to ghaT na jaegi tab-e-ariz

ye nam jis ka qamar rakha hai mujhi se ek dagh le gaya hai

samajh to dekho samajh raha hai falak usi ko jawab-e-ariz

kahin ilahi shab-e-judai tamam hone ko aa gai hai

numud-e-subh-e-jaza ho shayad ki main ne dekha hai KHwab-e-ariz

hui ye haal-e-zabun ki shohrat ki us ne KHajlat se munh chhupaya

bana hai rang-e-shikasta mera bahut dinon mein naqab-e-ariz

na puchho hum se ki kya sabab hai siyah rozi ka apni 'salik'

chamak raha hai bahut dinon se adu pe wo aaftab-e-ariz