milta nahin mizaj KHud apni ada mein hai

miltā nahīñ mizāj ḳhud apnī adā meñ hai

terī galī se aa ke sabā bhī havā meñ hai

ai ishq terī dūsrī manzil bhī hai kahīñ

marnā hai ibtidā meñ to kyā intihā meñ hai

laatī hai jab sabā to chamakte haiñ bām-o-dar

ye raushnī sī kyā tirī bū-e-qabā meñ hai

har rahguzar nishāñ hai tirī samt kā magar

iqrār-e-nā-rasī bhī har ik naqsh-e-pā meñ hai

tausīf-e-husn asl meñ hai vasf-e-husn-e-sāz

bandoñ se jis ko pyaar hai yād-e-ḳhudā meñ hai

ye tishnagī ye pās-e-vafā ye hujūm-e-ġham

kyā kārvān-e-shauq kisī karbalā meñ hai

sun kar ki 'hosh' ne bhī kiyā tark-e-ārzū

kohrām ik machā huā shahr-e-vafā meñ hai

milta nahin mizaj KHud apni ada mein hai

teri gali se aa ke saba bhi hawa mein hai

ai ishq teri dusri manzil bhi hai kahin

marna hai ibtida mein to kya intiha mein hai

lati hai jab saba to chamakte hain baam-o-dar

ye raushni si kya teri bu-e-qaba mein hai

har rahguzar nishan hai teri samt ka magar

iqrar-e-na-rasi bhi har ek naqsh-e-pa mein hai

tausif-e-husn asl mein hai wasf-e-husn-e-saz

bandon se jis ko pyar hai yaad-e-KHuda mein hai

ye tishnagi ye pas-e-wafa ye hujum-e-gham

kya karwan-e-shauq kisi karbala mein hai

sun kar ki 'hosh' ne bhi kiya tark-e-arzu

kohram ek macha hua shahr-e-wafa mein hai