mere azizo na dil jalao ki sham ab tak Dhali nahin hai

mire azīzo na dil jalāo ki shaam ab tak Dhalī nahīñ hai

charāġh kī lau zarā ghaTāo ki shaam ab tak Dhalī nahīñ hai

jo terā aanā muhāl-e-jāñ thā qarār bāñdhā thā ham se kyūñkar

nibhā sako qaul to nibhāo ki shaam ab tak Dhalī nahīñ hai

dinoñ ke jaage thakan ke maare ba-zauq-e-ġham ham se kah rahe haiñ

kitāb-e-māzī se kuchh sunāo ki shaam ab tak Dhalī nahīñ hai

sunahrā manzar nigār-e-ishrat chhalak rahā hai shafaq kā sāġhar

uThāo jām-e-sharāb uThāo ki shaam ab tak Dhalī nahīñ hai

bayāz-e-māzī se ham ne sīkhā hai rā.igānī malāl āḳhir

nashāt ke giit gungunāo ki shaam ab tak Dhalī nahīñ hai

ghaḌī do bhar ko jo aur chal leñ qarīb pā.eñge manziloñ ko

shikasta-pā ho ke chalte jaao ki shaam ab tak Dhalī nahīñ hai

mere azizo na dil jalao ki sham ab tak Dhali nahin hai

charagh ki lau zara ghaTao ki sham ab tak Dhali nahin hai

jo tera aana muhaal-e-jaan tha qarar bandha tha hum se kyunkar

nibha sako qaul to nibhao ki sham ab tak Dhali nahin hai

dinon ke jage thakan ke mare ba-zauq-e-gham hum se kah rahe hain

kitab-e-mazi se kuchh sunao ki sham ab tak Dhali nahin hai

sunahra manzar nigar-e-ishrat chhalak raha hai shafaq ka saghar

uThao jam-e-sharab uThao ki sham ab tak Dhali nahin hai

bayaz-e-mazi se hum ne sikha hai raigani malal aaKHir

nashat ke git gungunao ki sham ab tak Dhali nahin hai

ghaDi do bhar ko jo aur chal len qarib paenge manzilon ko

shikasta-pa ho ke chalte jao ki sham ab tak Dhali nahin hai