mere gham ke liye is bazm mein fursat kahan paida

mire ġham ke liye is bazm meñ fursat kahāñ paidā

yahāñ to ho rahī hai dāstāñ se dāstāñ paidā

vahī hai ek mastī sī vahāñ nazroñ meñ yaañ dil meñ

vahī hai ek shorish hī vahāñ pinhāñ yahāñ paidā

tū apnā kārvāñ le chal na kar ġham mere zarroñ kā

inhīñ zarroñ se ho jā.egā phir se kārvāñ paidā

mirī umreñ simaT aa.ī haiñ un ke ek lamhe meñ

baḌī muddat meñ hotī hai ye umr-e-jāvedāñ paidā

zarā tum ne nazar pherī ki jaise kuchh na thā dil meñ

zarā tum muskurā.e ho gayā phir ik jahāñ paidā

hamārī saḳht-jānī se huā shal haath qātil kā

sar-e-maqtal hī ham ne kar liyā dār-ul-amāñ paidā

tavaqqo hai ki badlegā zamāna lekin ai 'maikash'

zamāna hai yahī to ho chuke insāñ yahāñ paidā

mere gham ke liye is bazm mein fursat kahan paida

yahan to ho rahi hai dastan se dastan paida

wahi hai ek masti si wahan nazron mein yan dil mein

wahi hai ek shorish hi wahan pinhan yahan paida

tu apna karwan le chal na kar gham mere zarron ka

inhin zarron se ho jaega phir se karwan paida

meri umren simaT aai hain un ke ek lamhe mein

baDi muddat mein hoti hai ye umr-e-jawedan paida

zara tum ne nazar pheri ki jaise kuchh na tha dil mein

zara tum muskurae ho gaya phir ek jahan paida

hamari saKHt-jaani se hua shal hath qatil ka

sar-e-maqtal hi hum ne kar liya dar-ul-aman paida

tawaqqo hai ki badlega zamana lekin ai 'maikash'

zamana hai yahi to ho chuke insan yahan paida