mere ghubar-e-safar ka maal raushan hai

mire ġhubār-e-safar kā ma.aal raushan hai

shafaq shafaq abhī naqsh-e-zavāl raushan hai

sadā-e-gumbad-e-ta.abīr sun rahā huuñ maiñ

fazā-e-ḳhvāb meñ kirnoñ kā jaal raushan hai

vo ek fikriya lamha usī tarah hai abhī

tire javāb se merā savāl raushan hai

parind kyuuñ na uḌā.īñ hañsī añdheroñ kī

mire shajar kī abhī Daal Daal raushan hai

surūr terī rifāqat kā kam nahīñ hotā

tasavvurāt meñ rañg-e-visāl raushan hai

na koī baat hai kahne kī aur na sunñe kī

tumhārā mujh pe mirā tum pe haal raushan hai

savāl raah badalne kā hai to tum badlo

mirī dalīl hai vāzeh misāl raushan hai

jise maiñ vaqt ke sahrā meñ pheñk aayā huuñ

usī chaTān pe sadiyoñ kā haal raushan hai

diye jalātā huā baḌh rahā hai dast-e-havā

fazā muhīb hai lekin ḳhayāl raushan hai

shikārī apnī jagah mutma.in haiñ chup sādhe

parinde dekh rahe haiñ ki jaal raushan hai

kisī añdhere ko ḳhātir meñ tum nahīñ laanā

mirā charāġh ba-hadd-e-kamāl raushan hai

ye ehtiyāt-e-safar kā maqām hai 'nusrat'

yahāñ se vahshat-e-pā-e-ġhazāl raushan hai

mere ghubar-e-safar ka maal raushan hai

shafaq shafaq abhi naqsh-e-zawal raushan hai

sada-e-gumbad-e-tabir sun raha hun main

faza-e-KHwab mein kirnon ka jal raushan hai

wo ek fikriya lamha usi tarah hai abhi

tere jawab se mera sawal raushan hai

parind kyun na uDain hansi andheron ki

mere shajar ki abhi Dal Dal raushan hai

surur teri rifaqat ka kam nahin hota

tasawwuraat mein rang-e-visal raushan hai

na koi baat hai kahne ki aur na sunne ki

tumhaara mujh pe mera tum pe haal raushan hai

sawal rah badalne ka hai to tum badlo

meri dalil hai wazeh misal raushan hai

jise main waqt ke sahra mein phenk aaya hun

usi chaTan pe sadiyon ka haal raushan hai

diye jalata hua baDh raha hai dast-e-hawa

faza muhib hai lekin KHayal raushan hai

shikari apni jagah mutmain hain chup sadhe

parinde dekh rahe hain ki jal raushan hai

kisi andhere ko KHatir mein tum nahin lana

mera charagh ba-hadd-e-kamal raushan hai

ye ehtiyat-e-safar ka maqam hai 'nusrat'

yahan se wahshat-e-pa-e-ghazal raushan hai