مرے ہی جیسا مرے در پہ اک سوالی ہے

مرے ہی جیسا مرے در پہ اک سوالی ہے

میں کیا کروں کہ مرا ہاتھ خود ہی خالی ہے

ابھی بھی دور ہے سبزے سے کشت زار امید

کہ اب کے سال بھی پہلی سی خشک سالی ہے

ترے قریب نہ آتے کہ تیری قربت میں

کسے خبر تھی کہ اس طرح پائمالی ہے

تلاش ہم کو بھی ہے اپنے آسمانوں کی

خلا میں ہم نے بھی اپنی زمیں اچھالی ہے

ہر ایک لمحہ نئے زلزلوں سے لڑتے ہیں

کسی نے مملکت دل نہ یوں سنبھالی ہے

جلا چکا ہوں میں سارے عناصر احساس

ذرا سی جان مگر میں نے کیوں بچا لی ہے

وہ قتل ہو گیا آخر مناؤ جشن شعیبؔ

تمہیں تھا وہم کہ پھر اب کے وار خالی ہے