mere qarib raha wo ki mujhse dur raha

mire qarīb rahā vo ki mujh se duur rahā

koī na koī ta'alluq magar zarūr rahā

vo 'ādatan bhī sitamgar hai kuchh hamesha se

kuchh is meñ merī vafāoñ kā bhī qusūr rahā

koī na chhīn le phir mujh se mere hosh-o-havās

isī liye maiñ hamesha nashe meñ chuur rahā

mire ḳhilāf gavāhoñ meñ pesh pesh hai jo

tamām 'umr usī par mujhe ġhurūr rahā

vahī miTā.egā nām-o-nishāñ mirā 'balrāj'

mire vujūd pe jis ko bahut 'ubūr rahā

mere qarib raha wo ki mujh se dur raha

koi na koi ta'alluq magar zarur raha

wo 'adatan bhi sitamgar hai kuchh hamesha se

kuchh is mein meri wafaon ka bhi qusur raha

koi na chhin le phir mujh se mere hosh-o-hawas

isi liye main hamesha nashe mein chur raha

mere KHilaf gawahon mein pesh pesh hai jo

tamam 'umr usi par mujhe ghurur raha

wahi miTaega nam-o-nishan mera 'balraj'

mere wujud pe jis ko bahut 'ubur raha