meri fughan mein asar hai bhi aur hai bhi nahin

mirī fuġhāñ meñ asar hai bhī aur hai bhī nahīñ

udhar kisī kī nazar hai bhī aur hai bhī nahīñ

koī milegā ye kyā ham kaheñ yaqīn ke saath

parā.e dil kī ḳhabar hai bhī aur hai bhī nahīñ

milā thā husn to rahnā thā duur duur use

vo rashk-e-shams-o-qamar hai bhī aur hai bhī nahīñ

ummīd-o-bīm meñ ulfat ne ham ko Daal diyā

ilāj-e-dard-e-jigar hai bhī aur hai bhī nahīñ

karam ke saath sitam thā jafā ke saath vafā

nazar meñ un kī nazar hai bhī aur hai bhī nahīñ

mire ḳhayāl meñ aao mirī nazar meñ phiro

ye ik tarah kā safar hai bhī aur hai bhī nahīñ

jo pūchhtā huuñ to aḳhtar-shanās kahte haiñ

ki shām-e-ġham kī sahar hai bhī aur hai bhī nahīñ

janāb-e-'nūh' ye kyā baar baar kahte haiñ

vo josh-e-dīda-e-tar hai bhī aur hai bhī nahīñ

meri fughan mein asar hai bhi aur hai bhi nahin

udhar kisi ki nazar hai bhi aur hai bhi nahin

koi milega ye kya hum kahen yaqin ke sath

parae dil ki KHabar hai bhi aur hai bhi nahin

mila tha husn to rahna tha dur dur use

wo rashk-e-shams-o-qamar hai bhi aur hai bhi nahin

ummid-o-bim mein ulfat ne hum ko Dal diya

ilaj-e-dard-e-jigar hai bhi aur hai bhi nahin

karam ke sath sitam tha jafa ke sath wafa

nazar mein un ki nazar hai bhi aur hai bhi nahin

mere KHayal mein aao meri nazar mein phiro

ye ek tarah ka safar hai bhi aur hai bhi nahin

jo puchhta hun to aKHtar-shanas kahte hain

ki sham-e-gham ki sahar hai bhi aur hai bhi nahin

janab-e-'nuh' ye kya bar bar kahte hain

wo josh-e-dida-e-tar hai bhi aur hai bhi nahin