meri jaan ranj ghaTaiye qadam aage ab na baDhaiye

mirī jaan rañj ghaTā.iye qadam aage ab na baḌhā.iye

idhar aa.iye idhar aa.iye idhar aa.iye idhar aa.iye

khaḌe kab se ham sar-e-rāh haiñ kahīñ mar chukeñ ki tabāh haiñ

hadaf-e-ḳhadañg-e-nigāh haiñ zarā aañkh idhar bhī milā.iye

bhalā aanā aap kā kaam hai ye ġhalat tamām kalām hai

ajī bas hamārā salām hai kahīñ aur bāteñ banā.iye

tah-e-teġh tez hai ik jahāñ koī kushta hai koī nīm-jāñ

jo na ho dareġh tū mehrbāñ koī haath idhar bhī lagā.iye

kabhī mai se muñh ko na moḌiye havas-e-sharāb na chhoḌiye

sar-e-mohtasib hai na toḌiye jo kamāl-e-ġhaiz par aa.iye

ye kamāl-e-lutf hai sāqiyā yahī hai havas yahī mudda.ā

rahe hosh-e-sar na ḳhayāl-e-pā agar aisī mai hai to lā.iye

jo vufūr-e-chashm-e-pur-āb ho to jahān taḳhta-e-āb ho

abhī nuuh kā sā azaab ho agar ashk chand bahā.iye

vo kahā adū se hai maiñ ne kyā ki hue haiñ aap jo yuuñ ḳhafā

ye ġhazab ye jhuuT ye iftirā mire sāmne to bulā.iye

ġhazal aisī kāmil-e-vazn sun mutafā.ilun mutafā.ilun

hai 'nasīm' tāqat-e-hosh sun koī sher aur sunā.iye

meri jaan ranj ghaTaiye qadam aage ab na baDhaiye

idhar aaiye idhar aaiye idhar aaiye idhar aaiye

khaDe kab se hum sar-e-rah hain kahin mar chuken ki tabah hain

hadaf-e-KHadang-e-nigah hain zara aankh idhar bhi milaiye

bhala aana aap ka kaam hai ye ghalat tamam kalam hai

aji bas hamara salam hai kahin aur baaten banaiye

tah-e-tegh tez hai ek jahan koi kushta hai koi nim-jaan

jo na ho daregh tu mehrban koi hath idhar bhi lagaiye

kabhi mai se munh ko na moDiye hawas-e-sharab na chhoDiye

sar-e-mohtasib hai na toDiye jo kamal-e-ghaiz par aaiye

ye kamal-e-lutf hai saqiya yahi hai hawas yahi muddaa

rahe hosh-e-sar na KHayal-e-pa agar aisi mai hai to laiye

jo wufur-e-chashm-e-pur-ab ho to jahan taKHta-e-ab ho

abhi nuh ka sa azab ho agar ashk chand bahaiye

wo kaha adu se hai main ne kya ki hue hain aap jo yun KHafa

ye ghazab ye jhuT ye iftira mere samne to bulaiye

ghazal aisi kaamil-e-wazn sun mutafailun mutafailun

hai 'nasim' taqat-e-hosh sun koi sher aur sunaiye