meri minnat mere israr par jaana nahin pyare
mirī minnat mire isrār par jaanā nahīñ pyāre
na maane dil agar terā to phir aanā nahīñ pyāre
ye nisbat jism kī hai kyā bharosa hai rahe kab tak
badan ke naam par ab koī yārāna nahīñ pyāre
kuchh itne hosh ke asrār khulte jaate haiñ is par
tirā dīvāna ab itnā bhī dīvāna nahīñ pyāre
mire ḳhvāboñ meñ aa kar ab tujhe taklīf hī hogī
mire ḳhvāboñ meñ ab koī parī-ḳhāna nahīñ pyāre
maiñ apnī haar ko taslīm kar baiThā huuñ aur ḳhush huuñ
koī ummīd phir se mujh ko dikhlānā nahīñ pyāre
kisī ke sāmne kamzor mat honā mire 'tarkash'
kisī ke sāmne dāman ko phailānā nahīñ pyāre
meri minnat mere israr par jaana nahin pyare
na mane dil agar tera to phir aana nahin pyare
ye nisbat jism ki hai kya bharosa hai rahe kab tak
badan ke nam par ab koi yarana nahin pyare
kuchh itne hosh ke asrar khulte jate hain is par
tera diwana ab itna bhi diwana nahin pyare
mere KHwabon mein aa kar ab tujhe taklif hi hogi
mere KHwabon mein ab koi pari-KHana nahin pyare
main apni haar ko taslim kar baiTha hun aur KHush hun
koi ummid phir se mujh ko dikhlana nahin pyare
kisi ke samne kamzor mat hona mere 'tarkash'
kisi ke samne daman ko phailana nahin pyare
- Book : Udaas Logon Ka Hona Bahut Zaruri Hai (Pg. 54)
- Author : Tarkash Pradeep
- Publication : Rekhta Publications (2023)
- Edition : 2nd
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
