meri nazar ko abas tu burai deti hai

mirī nazar ko 'abas tū burā.ī detī hai

jo shai burī hai burī hī dikhā.ī detī hai

ye ḳhaak kaisī banā.ī hai ai ḳhudā tū ne

har ek rang meñ yaktā dikhā.ī detī hai

hamāre dil haiñ salāmat to phir har ik lamha

ye TūTne kī sadā kyoñ sunā.ī detī hai

ye roz roz kā milnā bhī Thiik hai lekin

mazā to yaar tirī kam-numā.ī detī hai

sunā.ī detī na thī jin ko kal mirī fariyād

ab un ko merī ḳhamoshī sunā.ī detī hai

hazār gard uḌātā phire vo nafrat kī

mujhe to sirf mohabbat dikhā.ī detī hai

kisī lihāz se mujrim nahīñ agar duniyā

to baar baar ye phir kyoñ safā.ī detī hai

dil us kā jurm to kartā hai har ghaḌī 'najmī'

aur us kī aañkh barābar safā.ī detī hai

meri nazar ko 'abas tu burai deti hai

jo shai buri hai buri hi dikhai deti hai

ye KHak kaisi banai hai ai KHuda tu ne

har ek rang mein yakta dikhai deti hai

hamare dil hain salamat to phir har ek lamha

ye TuTne ki sada kyon sunai deti hai

ye roz roz ka milna bhi Thik hai lekin

maza to yar teri kam-numai deti hai

sunai deti na thi jin ko kal meri fariyaad

ab un ko meri KHamoshi sunai deti hai

hazar gard uData phire wo nafrat ki

mujhe to sirf mohabbat dikhai deti hai

kisi lihaz se mujrim nahin agar duniya

to bar bar ye phir kyon safai deti hai

dil us ka jurm to karta hai har ghaDi 'najmi'

aur us ki aankh barabar safai deti hai