meri tauba jo TuTi hai shararat sab faza ki hai

mirī tauba jo TuuTī hai sharārat sab fazā kī hai

qusūr abr-e-bahārī kā ḳhatā kaalī ghaTā kī hai

kise ilzām deñ kashtī ke apnī Duub jaane kā

ḳhatā-e-nāḳhudā hogī magar marzī ḳhudā kī hai

na aaj ai shaiḳh tū Thukrā mai-e-gulfām ko hargiz

davā hī jaan kar pī jā are sardī balā kī hai

qanā'at kar are vā'iz jahāñ kī ne’matoñ par tū

banā jannat yahī duniyā ye duniyā bhī ḳhudā kī hai

visāl-e-haq kabhī mushkil kabhī āsān lagtā hai

zarā sā fāsla hai darmiyāñ dīvār anā kī hai

'atā ḳhil’at kahāñ se ho kare ikrām kaun is kā

rahe duur ahl-e-masnad se burī 'ādat 'sadā' kī hai

meri tauba jo TuTi hai shararat sab faza ki hai

qusur abr-e-bahaari ka KHata kali ghaTa ki hai

kise ilzam den kashti ke apni Dub jaane ka

KHata-e-naKHuda hogi magar marzi KHuda ki hai

na aaj ai shaiKH tu Thukra mai-e-gulfam ko hargiz

dawa hi jaan kar pi ja are sardi bala ki hai

qana'at kar are wa'iz jahan ki ne’maton par tu

bana jannat yahi duniya ye duniya bhi KHuda ki hai

visal-e-haq kabhi mushkil kabhi aasan lagta hai

zara sa fasla hai darmiyan diwar ana ki hai

'ata KHil’at kahan se ho kare ikram kaun is ka

rahe dur ahl-e-masnad se buri 'adat 'sada' ki hai