misal-e-sang khaDa hai usi hasin ki tarah

misāl-e-sañg khaḌā hai usī hasīñ kī tarah

makāñ kī shakl bhī dekho dil-e-makīñ kī tarah

mulā.emat hai añdhere meñ us kī sāñsoñ se

damak rahī haiñ vo āñkheñ hare nagīñ kī tarah

navāh-e-qarya hai sunsān shām-e-sarmā meñ

kisī qadīm zamāne kī sar-zamīñ kī tarah

zamīn duur se taarā dikhā.ī detī hai

rukā hai us pe qamar chashm-e-sair-bīñ kī tarah

fareb detī hai vus.at nazar kī ufuqoñ par

hai koī chiiz vahāñ sehr-e-nīlmīñ kī tarah

'munīr' ahd hai ab āḳhir-e-masāfat kā

ki chal rahī hai havā bād-e-vāpsīñ kī tarah

misal-e-sang khaDa hai usi hasin ki tarah

makan ki shakl bhi dekho dil-e-makin ki tarah

mulaemat hai andhere mein us ki sanson se

damak rahi hain wo aankhen hare nagin ki tarah

nawah-e-qarya hai sunsan sham-e-sarma mein

kisi qadim zamane ki sar-zamin ki tarah

zamin dur se tara dikhai deti hai

ruka hai us pe qamar chashm-e-sair-bin ki tarah

fareb deti hai wusat nazar ki ufuqon par

hai koi chiz wahan sehr-e-nilmin ki tarah

'munir' ahd hai ab aaKHir-e-masafat ka

ki chal rahi hai hawa baad-e-wapsin ki tarah