miT miT ke mohabbat mein teri yun tujhko pukare jate hain

miT miT ke mohabbat meñ terī yuuñ tujh ko pukāre jaate haiñ

kaT kaT kar dariyā kī tah meñ jis tarh kināre jaate haiñ

kyā ḳhuub hai terī mahfil bhī mahfil hai ki chakkar duniyā kā

kuchh niiñd ke maate aate haiñ kuchh dard ke maare jaate haiñ

kyoñ 'ishq ko miTnā husn ko banñā lāzim thā mā'lūm huā

kuchh kaam bigāḌe jaate haiñ kuchh kaam sañvāre jaate haiñ

rah mil to ga.ī hai manzil kī lekin ye huī hālat apnī

armān baḌhā.e jaate haiñ aur hausla haare jaate haiñ

yā daur-e-mohabbat thā vo bhī āñkhoñ meñ haiñ naqshe pal pal ke

yā vaqt ye aayā hai ki yūñhī ab 'umr guzāre jaate haiñ

ummīdoñ kī bastī ujḌī dil miT gayā lekin phir bhī vahāñ

ashkoñ kī ThanDī chhāoñ meñ aahoñ ke sharāre jaate haiñ

shaam aa.ī thī aanā thā unheñ kyā raat pahāḌ sī kaT bhī ga.ī

tang aa ke fareb-e-vā’da se yā chāñd sitāre jaate haiñ

miT miT ke mohabbat mein teri yun tujh ko pukare jate hain

kaT kaT kar dariya ki tah mein jis tarh kinare jate hain

kya KHub hai teri mahfil bhi mahfil hai ki chakkar duniya ka

kuchh nind ke mate aate hain kuchh dard ke mare jate hain

kyon 'ishq ko miTna husn ko banna lazim tha ma'lum hua

kuchh kaam bigaDe jate hain kuchh kaam sanware jate hain

rah mil to gai hai manzil ki lekin ye hui haalat apni

arman baDhae jate hain aur hausla haare jate hain

ya daur-e-mohabbat tha wo bhi aankhon mein hain naqshe pal pal ke

ya waqt ye aaya hai ki yunhi ab 'umr guzare jate hain

ummidon ki basti ujDi dil miT gaya lekin phir bhi wahan

ashkon ki ThanDi chhaon mein aahon ke sharare jate hain

sham aai thi aana tha unhen kya raat pahaD si kaT bhi gai

tang aa ke fareb-e-wa’da se ya chand sitare jate hain