miTate jate hain jo bhi nishan banate hain

miTāte jaate haiñ jo bhī nishāñ banāte haiñ

ham apne pīchhe kahāñ kārvāñ banāte haiñ

ham apne haath se apnā jahāñ banāte haiñ

sitāre gaḌhte haiñ aur kahkashāñ banāte haiñ

majāl kyā jo kisī gul ko chhū le bād-e-sumūm

ham apne tarz-e-amal se ḳhizāñ banāte haiñ

hamāre haath magar be-gharī hī lagtī hai

zamīñ banāte haiñ ham āsmāñ banāte haiñ

unheñ sambhāl ke rakhnā havā na denā tum

hamāre sher ye chiñgāriyāñ banāte haiñ

yaqīn rakkho ye manzar badalne vaalā hai

sharār uḌne se pahle dhuāñ banāte haiñ

kueñ se pyaas kā rishta koī nayā hai kyā

banāne vaale abas dāstāñ banāte haiñ

nayā banāne kī dhun meñ pata nahīñ chaltā

kahāñ bigāḌte haiñ aur kahāñ banāte haiñ

kisī buzurg kī sohbat meñ baiThte haiñ 'talab'

balā kī dhuup hai ab sā.ebāñ banāte haiñ

miTate jate hain jo bhi nishan banate hain

hum apne pichhe kahan karwan banate hain

hum apne hath se apna jahan banate hain

sitare gaDhte hain aur kahkashan banate hain

majal kya jo kisi gul ko chhu le baad-e-sumum

hum apne tarz-e-amal se KHizan banate hain

hamare hath magar be-ghari hi lagti hai

zamin banate hain hum aasman banate hain

unhen sambhaal ke rakhna hawa na dena tum

hamare sher ye chingariyan banate hain

yaqin rakkho ye manzar badalne wala hai

sharar uDne se pahle dhuan banate hain

kuen se pyas ka rishta koi naya hai kya

banane wale abas dastan banate hain

naya banane ki dhun mein pata nahin chalta

kahan bigaDte hain aur kahan banate hain

kisi buzurg ki sohbat mein baiThte hain 'talab'

bala ki dhup hai ab saeban banate hain