miTTi ke makan dekhta hun

miTTī ke makān dekhtā huuñ

sab jān-o-jahān dekhtā huuñ

lamhoñ meñ kahīñ sukūñ se baiThā

qarnoñ kī takān dekhtā huuñ

maiñ siikh rahā huuñ dekhnā kyā

āñkhoñ pe nishān dekhtā huuñ

bāzār meñ ajnabī huuñ yā'nī

phūloñ kī dukān dekhtā huuñ

ye chup kā mu'āmla hai āḳhir

hir-phir ke zabān dekhtā huuñ

maiñ aag lagā ke aadmī ko

sho'le kī uThān dekhtā huuñ

suntā thā azān-e-sub.h kal tak

ab sub.h-e-azān dekhtā huuñ

āñkhoñ kā lihāz hai kuchh itnā

har vaqt har aan dekhtā huuñ

miTTi ke makan dekhta hun

sab jaan-o-jahan dekhta hun

lamhon mein kahin sukun se baiTha

qarnon ki takan dekhta hun

main sikh raha hun dekhna kya

aankhon pe nishan dekhta hun

bazar mein ajnabi hun ya'ni

phulon ki dukan dekhta hun

ye chup ka mu'amla hai aaKHir

hir-phir ke zaban dekhta hun

main aag laga ke aadmi ko

sho'le ki uThan dekhta hun

sunta tha azan-e-subh kal tak

ab subh-e-azan dekhta hun

aankhon ka lihaz hai kuchh itna

har waqt har aan dekhta hun