miyan-e-KHalq hain par hain kahan hum

miyān-e-ḳhalq haiñ par haiñ kahāñ ham

hue haiñ ai miyāñ tere miyāñ ham

haiñ shāyad us parī-rū ke vahāñ ham

jo yuuñ nazroñ se rahte haiñ nihāñ ham

milegā ḳhizr ko apnā patā kab

ravāñ haiñ sūrat-e-reg-e-ravāñ ham

mohabbat meñ hue rusvā-e-ālam

jahāñ hañstā hai rote haiñ jahāñ ham

na.e sadme use dete raheñge

abhī dil kā kareñge imtihāñ ham

makān-e-asl ko jaate haiñ ai charḳh

tire ghar meñ the do din mehmāñ ham

majāl ab kyā jo ham se charb-go ho

tirī ai sham.a kāTeñge zabāñ ham

mubārak shaiḳh sāhib ko amāma

uThā.eñge na ye bār-e-garāñ ham

muayyan hai hamārā rizq azal se

tire mamnūñ nahīñ ai āsmāñ ham

muqaddar ne vahīñ kampā lagāyā

jahāñ baiThe chaman meñ bāġhbāñ ham

mayassar faiz sāhab se haiñ ustād

dakan se jaa.eñ kyoñ hindostāñ ham

maqām apnā hai 'bāqī' be-maqāmī

makāñ rakhte nahīñ juz lā-makāñ ham

miyan-e-KHalq hain par hain kahan hum

hue hain ai miyan tere miyan hum

hain shayad us pari-ru ke wahan hum

jo yun nazron se rahte hain nihan hum

milega KHizr ko apna pata kab

rawan hain surat-e-reg-e-rawan hum

mohabbat mein hue ruswa-e-alam

jahan hansta hai rote hain jahan hum

nae sadme use dete rahenge

abhi dil ka karenge imtihan hum

makan-e-asl ko jate hain ai charKH

tere ghar mein the do din mehman hum

majal ab kya jo hum se charb-go ho

teri ai shama kaTenge zaban hum

mubarak shaiKH sahib ko amama

uThaenge na ye bar-e-garan hum

muayyan hai hamara rizq azal se

tere mamnun nahin ai aasman hum

muqaddar ne wahin kampa lagaya

jahan baiThe chaman mein baghban hum

mayassar faiz sahab se hain ustad

dakan se jaen kyon hindostan hum

maqam apna hai 'baqi' be-maqami

makan rakhte nahin juz la-makan hum