mohabbat ehtimam-e-dar bhi hai

mohabbat ehtimām-e-dār bhī hai

mohabbat misr kā bāzār bhī hai

mohabbat mustaqil āzār bhī hai

ye gulshan vādī-e-pur-ḳhār bhī hai

vo tūfāñ jo Dubo detā hai aksar

isī tūfāñ se beḌā paar bhī hai

ḳhudī kī had meñ hai majbūr insān

ḳhudī miT jaa.e to muḳhtār bhī hai

harīm-e-dil meñ bhī hai jalva-farmā

mirā yūsuf sar-e-bāzār bhī hai

na kyoñ mar jā.iye marne se pahle

yahī honā ma.āl-e-kār bhī hai

mirā chāk-e-garebāñ siine vaale

ye dil meñ zaḳhm-e-dāman-dār bhī hai

zamāne ko shikāyat hai vafā kī

zamāna ḳhud vafā-bezār bhī hai

mirī nākāmiyāñ shāhid haiñ is kī

maiñ ab samjhā ki tū muḳhtār bhī hai

mire dil kī tamannā.eñ na pūchho

ye nādāñ 'āfiyat-bezār bhī hai

koī had bhī vafā ke imtihāñ kī

satāne kā koī me'yār bhī hai

ye kahtī hai sadā-e-lan-tarānī

kisī meñ tāqat-e-dīdār bhī hai

nahīñ bahkā kabhī 'maḳhmūr' pī kar

ye dīvāna bhī hai hushiyār bhī hai

mohabbat ehtimam-e-dar bhi hai

mohabbat misr ka bazar bhi hai

mohabbat mustaqil aazar bhi hai

ye gulshan wadi-e-pur-KHar bhi hai

wo tufan jo Dubo deta hai aksar

isi tufan se beDa par bhi hai

KHudi ki had mein hai majbur insan

KHudi miT jae to muKHtar bhi hai

harim-e-dil mein bhi hai jalwa-farma

mera yusuf sar-e-bazar bhi hai

na kyon mar jaiye marne se pahle

yahi hona maal-e-kar bhi hai

mera chaak-e-gareban sine wale

ye dil mein zaKHm-e-daman-dar bhi hai

zamane ko shikayat hai wafa ki

zamana KHud wafa-bezar bhi hai

meri nakaamiyan shahid hain is ki

main ab samjha ki tu muKHtar bhi hai

mere dil ki tamannaen na puchho

ye nadan 'afiyat-bezar bhi hai

koi had bhi wafa ke imtihan ki

satane ka koi me'yar bhi hai

ye kahti hai sada-e-lan-tarani

kisi mein taqat-e-didar bhi hai

nahin bahka kabhi 'maKHmur' pi kar

ye diwana bhi hai hushiyar bhi hai