mohabbat mein na jaane kyun hamein fursat ziyaada hai

mohabbat meñ na jaane kyuuñ hameñ fursat ziyāda hai

hamārā kaam thoḌā hai magar mohlat ziyāda hai

hameñ is ālam-e-hijrāñ meñ bhī ruk ruk ke chalnā hai

unheñ jaane diyā jaa.e jinheñ ujlat ziyāda hai

ye dil bāhar dhaḌaktā hai ye aañkh andar ko khultī hai

ham aise marhale meñ haiñ jahāñ zahmat ziyāda hai

so ham fariyādiyoñ kī ek apnī saf alag se ho

hamārā mas.ala ye hai hameñ hairat ziyāda hai

samajh paa.e nahīñ dekhe baġhair us kā nazar aanā

mashaqqat kam se kam kī thī magar ujrat ziyāda hai

tamāshā-gāh chāroñ samt se pur-shor hai ya.anī

kahīñ jalvat ziyāda hai kahīñ ḳhalvat ziyāda hai

tujhe halqa-ba-halqa khīñchte phirte haiñ duniyā meñ

so ai zanjīr-e-pā yuuñ bhī tirī shohrat ziyāda hai

ye saarī āmad-o-raft ek jaisī to nahīñ 'shāhīn'

ki duniyā meñ safar kam kam hai aur hijrat ziyāda hai

mohabbat mein na jaane kyun hamein fursat ziyaada hai

hamara kaam thoDa hai magar mohlat ziyaada hai

hamein is aalam-e-hijran mein bhi ruk ruk ke chalna hai

unhen jaane diya jae jinhen ujlat ziyaada hai

ye dil bahar dhaDakta hai ye aankh andar ko khulti hai

hum aise marhale mein hain jahan zahmat ziyaada hai

so hum fariyaadiyon ki ek apni saf alag se ho

hamara masala ye hai hamein hairat ziyaada hai

samajh pae nahin dekhe baghair us ka nazar aana

mashaqqat kam se kam ki thi magar ujrat ziyaada hai

tamasha-gah chaaron samt se pur-shor hai yani

kahin jalwat ziyaada hai kahin KHalwat ziyaada hai

tujhe halqa-ba-halqa khinchte phirte hain duniya mein

so ai zanjir-e-pa yun bhi teri shohrat ziyaada hai

ye sari aamad-o-raft ek jaisi to nahin 'shahin'

ki duniya mein safar kam kam hai aur hijrat ziyaada hai