mohabbat mein shab-e-tarik-e-hijran kaun dekhega

mohabbat meñ shab-e-tārīk-e-hijrāñ kaun dekhegā

hamīñ dekheñge ye ḳhvāb-e-pareshāñ kaun dekhegā

in āñkhoñ se tajallī ko daraḳhshāñ kaun dekhegā

uThā bhī do naqāb-e-rū-e-tābāñ kaun dekhegā

yahī ik raat hai bas kā.enāt-e-zindagī apnī

sahar hotī huī ai shām-e-hijrāñ kaun dekhegā

chaman meñ gir rahī haiñ bijliyāñ shāḳh-e-nasheman par

yahāñ tak apnī barbādī kā sāmāñ kaun dekhegā

basānā hī paḌegā ik na ik din ḳhāna-e-dil ko

bane phirte ho yūsuf shām-e-zindāñ kaun dekhegā

haqīqat meñ taqāzā bhī yahī hai parda-dārī kā

raho tum aañkh ke pardoñ meñ pinhāñ kaun dekhegā

kuchh aisā ho dam-e-āḳhir na aa.eñ vo 'ayādat ko

unheñ apne kiye par yuuñ pashemāñ kaun dekhegā

mujhī par aa.egā ilzām merī pā.imālī kā

tirī raftār ko ai fitna-sāmāñ kaun dekhegā

jo ġhunche kal khile the aaj vo murjhā.e jaate haiñ

mirī nazroñ se rang-e-bazm-e-imkāñ kaun dekhegā

yahī ab bhī sadā.eñ vādī-e-aiman se aatī haiñ

kahāñ haiñ tālib-e-dīdār-e-jānāñ kaun dekhegā

nafas ke saath hī qaid-e-ta'alluq Tuut jaatī hai

palaT kar phir sū-e-gor-e-ġharībāñ kaun dekhegā

‘azāb-e-hashr se tū kyoñ Darātā hai mujhe vā'iz

tujhe mā'lūm bhī hai fard-e-'isyāñ kaun dekhegā

ye duniyā hai hañsā kartī hai auroñ kī musībat par

tirā ronā yahāñ ai chashm-e-giryāñ kaun dekhegā

chalo 'maḳhmūr' tanhā.ī meñ shaġhl-e-mai-kashī hogā

chhupā kar le chalo piine kā sāmāñ kaun dekhegā

mohabbat mein shab-e-tarik-e-hijran kaun dekhega

hamin dekhenge ye KHwab-e-pareshan kaun dekhega

in aankhon se tajalli ko daraKHshan kaun dekhega

uTha bhi do naqab-e-ru-e-taban kaun dekhega

yahi ek raat hai bas kaenat-e-zindagi apni

sahar hoti hui ai sham-e-hijran kaun dekhega

chaman mein gir rahi hain bijliyan shaKH-e-nasheman par

yahan tak apni barbaadi ka saman kaun dekhega

basana hi paDega ek na ek din KHana-e-dil ko

bane phirte ho yusuf sham-e-zindan kaun dekhega

haqiqat mein taqaza bhi yahi hai parda-dari ka

raho tum aankh ke pardon mein pinhan kaun dekhega

kuchh aisa ho dam-e-aKHir na aaen wo 'ayaadat ko

unhen apne kiye par yun pasheman kaun dekhega

mujhi par aaega ilzam meri paimali ka

teri raftar ko ai fitna-saman kaun dekhega

jo ghunche kal khile the aaj wo murjhae jate hain

meri nazron se rang-e-bazm-e-imkan kaun dekhega

yahi ab bhi sadaen wadi-e-aiman se aati hain

kahan hain talib-e-didar-e-jaanan kaun dekhega

nafas ke sath hi qaid-e-ta'alluq Tut jati hai

palaT kar phir su-e-gor-e-ghariban kaun dekhega

‘azab-e-hashr se tu kyon Daraata hai mujhe wa'iz

tujhe ma'lum bhi hai fard-e-'isyan kaun dekhega

ye duniya hai hansa karti hai auron ki musibat par

tera rona yahan ai chashm-e-giryan kaun dekhega

chalo 'maKHmur' tanhai mein shaghl-e-mai-kashi hoga

chhupa kar le chalo pine ka saman kaun dekhega