mohabbaton ka bhi andaz tajirana hai

mohabbatoñ kā bhī andāz tājirāna hai

'ajīb rang meñ Duubā huā zamāna hai

kuchh aur vaqt tire shahr meñ gañvānā hai

aur is ke baa'd mujhe gaañv lauT jaanā hai

kabhī zabāñ pe mohabbat kā naam aayā thā

bas itnī baat pe dushman mirā zamāna hai

tumhārā pyaar mirī zindagī bane na bane

magar mire liye jiine kā ik bahāna hai

'ajīb tarh guzārī hai zindagī maiñ ne

na dushmanī hai kisī se na dostāna hai

ham apne jhunD se bichhḌe hue parinde haiñ

na koī ghar hai hamārā na ab Thikāna hai

jahāñ fazāoñ meñ uḌtī thiiñ ḳhushbueñ 'arshad'

vahāñ havāoñ meñ ab ḳhāk-e-āshiyāna hai

mohabbaton ka bhi andaz tajirana hai

'ajib rang mein Duba hua zamana hai

kuchh aur waqt tere shahr mein ganwana hai

aur is ke ba'd mujhe ganw lauT jaana hai

kabhi zaban pe mohabbat ka nam aaya tha

bas itni baat pe dushman mera zamana hai

tumhaara pyar meri zindagi bane na bane

magar mere liye jine ka ek bahana hai

'ajib tarh guzari hai zindagi main ne

na dushmani hai kisi se na dostana hai

hum apne jhunD se bichhDe hue parinde hain

na koi ghar hai hamara na ab Thikana hai

jahan fazaon mein uDti thin KHushbuen 'arshad'

wahan hawaon mein ab KHak-e-ashiyana hai