محبتوں کے مقابل یہ سال درد کا ہے

محبتوں کے مقابل یہ سال درد کا ہے

مجھے ہے ہجر کا غم اور ملال درد کا ہے

چلو یہ مان لیا تم کو بھولنا ہے ہمیں

بھلا بھی دیں مگر اب بھی سوال درد کا ہے

نکل کے دل سے تو شاخ نظر پہ جھول کبھی

دیار دل میں مسلسل وبال درد کا ہے

ذرا ذرا سی چمک ہے اداس چہرے پر

دبی دبی سی ہنسی میں ہلال درد کا ہے

دماغ و دل پہ ہے الفاظ کا جنوں طاری

مگر غزل میں تو رکھنا خیال درد کا ہے

مہک رہی ہے تصور سے میری تنہائی

کہیں قریب ہی رکھا رومال درد کا ہے