mudawa-e-dil-e-diwana karte

mudāvā-e-dil-e-dīvāna karte

ye karte ham to kuchh achchhā na karte

vafā sādiq agar hotī hamārī

vo karte bhī to jaur itnā na karte

ham achchhā thā jo bahr-e-parda-poshī

mohabbat kā tirī charchā na karte

tumhārī fitna-pardāzī kā shikvā

jo ham karte to kuchh bejā na karte

nigāheñ āshiqoñ kī thī havas-kār

vo kyā karte agar pardā na karte

jo phir milne kī hotī kuchh bhī ummīd

to ham us ke liye kyā kyā na karte

talab kā hausla hotā to ik din

ḳhitāb us but se bebākāna na karte

hamārā paas unheñ kuchh bhī jo hotā

kisī kī aur ham parvā na karte

shakebā.ī kā dam rakhte to 'hasrat'

unheñ yuuñ shauq se dekhā na karte

mudawa-e-dil-e-diwana karte

ye karte hum to kuchh achchha na karte

wafa sadiq agar hoti hamari

wo karte bhi to jaur itna na karte

hum achchha tha jo bahr-e-parda-poshi

mohabbat ka teri charcha na karte

tumhaari fitna-pardazi ka shikwa

jo hum karte to kuchh beja na karte

nigahen aashiqon ki thi hawas-kar

wo kya karte agar parda na karte

jo phir milne ki hoti kuchh bhi ummid

to hum us ke liye kya kya na karte

talab ka hausla hota to ek din

KHitab us but se bebakana na karte

hamara pas unhen kuchh bhi jo hota

kisi ki aur hum parwa na karte

shakebai ka dam rakhte to 'hasrat'

unhen yun shauq se dekha na karte