mujhko furqat ki asiri se rihai hoti

mujh ko furqat kī asīrī se rihā.ī hotī

kaash iisā ke evaz maut hī aa.ī hotī

āshiqī meñ jo maza hai to yahī furqat hai

lutf kyā thā jo agar us se judā.ī hotī

gar na ho sham.a to ma.adūm haiñ parvāne bhī

tū na hotā to sanam kab ye ḳhudā.ī hotī

ġhair se karte ho abrū ke ishāre har dam

kabhī talvār to mujh par bhī lagā.ī hotī

us kī har dam kī nasīhat se maiñ tañg aayā huuñ

kaash nāseh se bhī aañkh us ne laḌā.ī hotī

huuñ vo ġham-dost ki sab apne hī dil meñ bhartā

ġham-e-ālam kī agar is meñ samā.ī hotī

ḳhat ke āġhāz meñ to mujh se huā saaf tū kab

lutf tab thā ki safā.ī meñ safā.ī hotī

abr-e-rahmat se to mahrūm rahī kisht mirī

koī bijlī hī falak tū ne girā.ī hotī

dasht-e-pur-ḳhār meñ mehñdī kī havas bhī niklī

kab hamārī kaf-e-pā varna hinā.ī hotī

dhoī kyuuñ ashk ke tūfān se lauh-e-mahfūz

sar-navisht apnī hī 'nāsiḳh' ne miTā.ī hotī

mujh ko furqat ki asiri se rihai hoti

kash isa ke ewaz maut hi aai hoti

aashiqi mein jo maza hai to yahi furqat hai

lutf kya tha jo agar us se judai hoti

gar na ho shama to madum hain parwane bhi

tu na hota to sanam kab ye KHudai hoti

ghair se karte ho abru ke ishaare har dam

kabhi talwar to mujh par bhi lagai hoti

us ki har dam ki nasihat se main tang aaya hun

kash naseh se bhi aankh us ne laDai hoti

hun wo gham-dost ki sab apne hi dil mein bharta

gham-e-alam ki agar is mein samai hoti

KHat ke aaghaz mein to mujh se hua saf tu kab

lutf tab tha ki safai mein safai hoti

abr-e-rahmat se to mahrum rahi kisht meri

koi bijli hi falak tu ne girai hoti

dasht-e-pur-KHar mein mehndi ki hawas bhi nikli

kab hamari kaf-e-pa warna hinai hoti

dhoi kyun ashk ke tufan se lauh-e-mahfuz

sar-nawisht apni hi 'nasiKH' ne miTai hoti