مجھ کو حاصل جو وصف دعا ہو گیا

مجھ کو حاصل جو وصف دعا ہو گیا

میں جدھر چل پڑا راستہ ہو گیا

نیل میں جب وہ اترے تو کیا ہو گیا

زعم فرعون ٹوٹا فنا ہو گیا

موت کس کی ہے کب رزق ہے کس قدر

روز اول ہی یہ فیصلہ ہو گیا

تھام لوں گا میں اس دن عنان جہاں

مہرباں مجھ پہ جس دن خدا ہو گیا

ایک اک کرکے مہرے سبھی پٹ گئے

ان کی بازی کا یوں خاتمہ ہو گیا

یاد رب اور ذکر حبیب خدا

روز و شب یہ مرا مشغلہ ہو گیا

میں جو پہنچا حبیبؔ اپنے آقا کے در

مجھ پہ لطف شہہ دو سرا ہو گیا