mujhko jo kahte ho myan tum ho kahan tum ho kahan

mujh ko jo kahte ho myaañ tum ho kahāñ tum ho kahāñ

dil kahāñ hai paas mere merī jaañ tum ho kahāñ

vo galī hai yā parī-ḳhāna hai yā firdaus hai

sach kaho ai hamdamo maiñ huuñ kahāñ tum ho kahāñ

apne se apnā na ho kaam auroñ se rakhiye umiid

kyā vasiyyat karte ho ai dostāñ tum ho kahāñ

gul khileñge baar baar aur aa.egī hir-phir bahār

hai hamesha sair-e-gulzār-e-jahāñ tum ho kahāñ

jab javānī ga.ī rahā kyā aanā jaanā sab gayā

aao jaane do vo bāteñ ai miyāñ tum ho kahāñ

dekhne kā chaav ye ainak utartī hī nahīñ

dekho tum apnī taraf ai mehrbāñ tum ho kahāñ

pūchhte haiñ haal to muñh dekh rahte ho 'razā'

dil kahīñ aur hī hai sunte ho miyāñ tum ho kahāñ

mujh ko jo kahte ho myan tum ho kahan tum ho kahan

dil kahan hai pas mere meri jaan tum ho kahan

wo gali hai ya pari-KHana hai ya firdaus hai

sach kaho ai hamdamo main hun kahan tum ho kahan

apne se apna na ho kaam auron se rakhiye umid

kya wasiyyat karte ho ai dostan tum ho kahan

gul khilenge bar bar aur aaegi hir-phir bahaar

hai hamesha sair-e-gulzar-e-jahan tum ho kahan

jab jawani gai raha kya aana jaana sab gaya

aao jaane do wo baaten ai miyan tum ho kahan

dekhne ka chaw ye ainak utarti hi nahin

dekho tum apni taraf ai mehrban tum ho kahan

puchhte hain haal to munh dekh rahte ho 'raza'

dil kahin aur hi hai sunte ho miyan tum ho kahan